പ്രണയ പെന്‍ഡുലം

സഹന കാലചക്രങ്ങളില്‍

സമയ തീരങ്ങളെ

തൊട്ടുതൊട്ടാടുന്ന

പ്രണയ പെന്‍ഡുലമാണ് നീ.

കാലചക്രങ്ങളെ കോര്‍ത്തിണക്കിയും

സമയതീരങ്ങളെ സമമായിണക്കിയും

സ്വഹൃദയതാളം മറന്നാടുന്നു നീ

സൂചിമിടിപ്പുകള്‍ മറക്കാതെ.

ആരോ തിരിച്ചുവിട്ട

ഗതികോര്‍ജ്ജ നിറവില്‍

കഥയറിയാതെയാടുന്നു നീ

കദന സ്വനങ്ങളുണര്‍ത്തി നീ.

എന്നെങ്കിലും നിലക്കും

നിന്നെ തിരിക്കുമാ കരങ്ങള്‍

അന്ന് നിന്നാട്ടം നിലക്കും

സമയതീരങ്ങള്‍ തേങ്ങവേ.