ദേശീയ മാലിന്യ പുരസ്കാരങ്ങള്‍ പ്രഖ്യാപിച്ചു.

ദേശീയ  മാലിന്യ സംസ്കരണ മേഖലയില്‍ മികച്ച പ്രകടനം കാഴ്ച വച്ചിട്ടുള്ള മഹാരഥന്‍മാര്‍ക്കുള്ളതാണ് ദേശീയ മാലിന്യ പുരസ്കാരങ്ങള്‍. മാലിന്യ ഭൂഷണ്‍, മാലിന്യ രത്ന, മാലിന്യ സര്‍ഗ്ഗ എന്നീ മൂന്നു പുരസ്കാരങ്ങളാണുള്ളത്. 2011 -2012 വര്‍ഷത്തേക്കുള്ള പുരസ്കാരങ്ങളാണ് ഇപ്പോള്‍ പ്രഖ്യാപിച്ചിരിക്കുന്നത്.

കേരളത്തിലെ വര്‍ഷങ്ങളായുള്ള  മാലിന്യ പ്രശ്നത്തില്‍, കഴിഞ്ഞ എട്ടു ദിവസമായി നിരാഹാര സമരം നടത്തിവരുന്ന ശ്രി.കെ.വേണുവിനെ അതിസമര്‍ത്ഥമായി അറസ്റ്റ്  ചെയ്തുനീക്കുകയും അടുത്ത ഒരു വര്‍ഷം കൊണ്ട് 50 ആളെ വച്ച് മാലിന്യം മുഴുവനും ആരാന്റെ വളപ്പിലേക്ക് നീക്കം ചെയ്യാമെന്നും പ്രഖ്യാപിച്ച കര്‍മധീരനായ തൃശൂര്‍ മേയറെയാണ് മാലിന്യ ഭൂഷണ്‍ നല്‍കി ആദരിക്കുന്നത്.

കേരളത്തിലെ വര്‍ഷങ്ങളായുള്ള  മാലിന്യ പ്രശ്നത്തില്‍, അവരവരുടെ അശ്രാന്ത പരിശ്രമം കൊണ്ട് രാജ്യത്തെ മാലിന്യ പ്രശ്നം ഈ വിധത്തില്‍ ഒരു ബഹുജന പ്രശ്നപരിഹാര രഹിതമായ അവസ്ഥയിലേക്ക് കൂപ്പു കുത്തിച്ച സര്‍വ്വകഷി അംഗങ്ങള്‍ക്കാണ്‌ മാലിന്യ രത്ന പുരസ്കാരം സമ്മാനിക്കുന്നത് .

കേരളത്തിലെ ഏക്കാലത്തേയും സാമൂഹ്യ പ്രശ്നങ്ങള്‍ സ്വന്തം എഴുത്ത് മേശയിലിരുന്നു കൊണ്ട് ഒരു കയ്യൊപ്പോടെ പരിഹരിച്ച് സാംസ്കാരിക മികവു പ്രകടിപ്പിച്ചിട്ടുള്ള സാംസ്കാരിക നായകന്മാര്‍ക്കുള്ളതാണ് മാലിന്യ സര്‍ഗ്ഗ പുരസ്കാരം .

ദേശീയ മാലിന്യ പുരസ്കാരങ്ങള്‍ പിറവം ഉപതെരഞ്ഞെടുപ്പിന് ശേഷം ഉണ്ടാവാനിടയുള്ള തിരുപ്പിറവി നാളില്‍ പിറവത്ത് വച്ചുതന്നെ  ഈ മാലിന്യ ശ്രേഷ്ടര്‍ക്ക് സമ്മാനിക്കുന്നതാണ് .

ഡോ. സി.ടി. വില്യം